హైదరాబాద్: తెలంగాణ ముఖ్యమంత్రి రేవంత్రెడ్డి గురువారం ఢిల్లీకి బయల్దేరారు. ఈ సందర్భంగా దేశ రాజకీయ పరిణామాలు, ముఖ్యంగా డీలిమిటేషన్ అంశంపై జాతీయ స్థాయిలో చర్చలు జరపడానికి ఆయన ఇండియా (INDIA) కూటమి నేతలతో సమావేశం కానున్నారు. రాష్ట్రాల ప్రాతినిధ్యం, జనాభా ఆధారిత స్థానాల పునర్విభజన వంటి కీలక అంశాలపై తన అభిప్రాయాలను కూటమి నేతల ముందుంచనున్నట్లు సమాచారం.
డీలిమిటేషన్ విషయంలో కేవలం జనాభాను మాత్రమే ప్రమాణంగా తీసుకోవడం వల్ల అభివృద్ధి చెందిన రాష్ట్రాలకు అన్యాయం జరిగే అవకాశం ఉందని సీఎం రేవంత్రెడ్డి అభిప్రాయపడుతున్నట్లు తెలుస్తోంది. ఈ నేపథ్యంలో ఆయన “హైబ్రిడ్ మోడల్”ను జాతీయ స్థాయిలో ప్రచారం చేయాలని నిర్ణయించుకున్నారు. ఈ మోడల్ ప్రకారం, పార్లమెంట్ స్థానాల పునర్విభజనలో జనాభాకు 50 శాతం ప్రాధాన్యం, రాష్ట్ర జీఎస్డీపీ (స్థూల రాష్ట్ర దేశీయోత్పత్తి)కి 50 శాతం ప్రాధాన్యం ఇవ్వాలని డిమాండ్ చేస్తున్నారు.
రాష్ట్రాల అభివృద్ధి, ఆదాయ సృష్టి, పన్నుల వసూళ్లు మరియు దేశ ఆర్థిక వ్యవస్థకు అందిస్తున్న వాటాను కూడా పరిగణనలోకి తీసుకోవాలని సీఎం భావిస్తున్నారని పార్టీ వర్గాలు వెల్లడించాయి. ముఖ్యంగా దక్షిణాది రాష్ట్రాలు జనాభా నియంత్రణలో ముందంజలో ఉన్నప్పటికీ, కేవలం జనాభా ప్రమాణం ఆధారంగా స్థానాల సంఖ్య తగ్గిపోవడం అన్యాయమని ఆయన వాదించనున్నట్లు తెలుస్తోంది.
ఢిల్లీలో జరిగే ఈ సమావేశాల్లో ఇతర రాష్ట్రాల ముఖ్య నేతలతో కూడా సీఎం రేవంత్రెడ్డి భేటీ అయ్యే అవకాశం ఉంది. డీలిమిటేషన్ అంశంపై ఒక సమిష్టి వ్యూహాన్ని రూపొందించి, కేంద్రంపై ఒత్తిడి తీసుకురావడమే ఈ పర్యటన ప్రధాన లక్ష్యంగా భావిస్తున్నారు.
దేశవ్యాప్తంగా ఈ హైబ్రిడ్ మోడల్పై విస్తృత చర్చకు శ్రీకారం చుట్టేందుకు సీఎం రేవంత్రెడ్డి చేపట్టిన ఈ ప్రయత్నం రాజకీయంగా ప్రాధాన్యత సంతరించుకుంది.