డిజిటల్ గవర్నెన్స్‌తో పారదర్శక పాలన

హైదరాబాద్, జూలై 7: రాష్ట్ర పరిపాలనను మరింత పారదర్శకంగా, జవాబుదారీతనంతో కూడినదిగా తీర్చిదిద్దేందుకు డిజిటల్ గవర్నెన్స్‌ను పూర్తిస్థాయిలో అమలు చేయాలని ముఖ్యమంత్రి రేవంత్ రెడ్డి అధికారులను ఆదేశించారు. ముఖ్యంగా కాంట్రాక్టు, ఔట్‌సోర్సింగ్ ఉద్యోగుల సేవా వివరాలు, వేతనాలు, బ్యాంకు ఖాతాల సమాచారాన్ని పూర్తిగా డిజిటలైజ్ చేసి ప్రతి నెలా సమయానికి జీతాలు అందేలా సమగ్ర వ్యవస్థను రూపొందించాలని స్పష్టం చేశారు. మంగళవారం ఎంసీఆర్ హెచ్‌ఆర్‌డీలోని బోధి పెవిలియన్‌లో కాంట్రాక్టు, ఔట్‌సోర్సింగ్ ఉద్యోగుల సమస్యలపై నిర్వహించిన ఉన్నతస్థాయి సమీక్ష సమావేశంలో ముఖ్యమంత్రి కీలక ఆదేశాలు జారీ చేశారు. రాష్ట్రంలో డిజిటల్ గవర్నెన్స్‌ను బలోపేతం చేసేందుకు అవసరమైన విధానాలను రూపొందించడంతో పాటు చట్టపరమైన మార్పులను కూడా పరిశీలించాలని అధికారులకు సూచించారు. సంక్షేమ పథకాల లబ్ధి అర్హులకు నేరుగా చేరడంతో పాటు ప్రభుత్వ సేవలు వేగవంతంగా, నాణ్యంగా అందించడంలో డిజిటల్ గవర్నెన్స్ కీలక పాత్ర పోషిస్తుందని సీఎం పేర్కొన్నారు. ప్రభుత్వ ఉద్యోగులతో పాటు కాంట్రాక్టు, ఔట్‌సోర్సింగ్ ఉద్యోగులందరి సేవా వివరాలను ఒకే డిజిటల్ ప్లాట్‌ఫారమ్‌లో నమోదు చేయాలని ఆదేశించారు.

ఏజెన్సీల అక్రమాలపై సీఎం ఆగ్రహం:  సమీక్షలో అధికారులు రాష్ట్రవ్యాప్తంగా సుమారు 4,800 కాంట్రాక్టు, ఔట్‌సోర్సింగ్ ఏజెన్సీలు పనిచేస్తున్నాయని, వాటిలో 4,300 ఏజెన్సీలు ఉద్యోగులకు ఈఎస్ఐ, పీఎఫ్ సౌకర్యాలు కల్పించడం లేదని ముఖ్యమంత్రికి వివరించారు. ప్రభుత్వం బిల్లులు సకాలంలో చెల్లించినప్పటికీ ఉద్యోగులకు జీతాలు ఆలస్యంగా అందుతున్నాయని తెలిపారు. ఈ పరిస్థితిపై తీవ్ర అసంతృప్తి వ్యక్తం చేసిన సీఎం, ఉద్యోగుల హక్కులను ఉల్లంఘిస్తున్న ఏజెన్సీలపై కఠిన చర్యలు తీసుకోవాలని అధికారులను ఆదేశించారు. డిజిటల్ వ్యవస్థ ద్వారా ఏజెన్సీల పనితీరును నిరంతరం పర్యవేక్షించి అక్రమాలకు అడ్డుకట్ట వేయాలని సూచించారు.

ప్రతి నెల 1 నుంచి 5వ తేదీలోపు జీతాలు:  కాంట్రాక్టు, ఔట్‌సోర్సింగ్ ఉద్యోగులకు ప్రతి నెల 1 నుంచి 5వ తేదీ మధ్యలో పారదర్శకంగా జీతాలు చెల్లించే విధానం అమలు చేయాలని సీఎం స్పష్టం చేశారు. ఉద్యోగుల సేవా వివరాలు, బ్యాంకు ఖాతాలు, వేతన సమాచారం మొత్తం డిజిటల్ రికార్డుల్లో ఉండేలా చర్యలు తీసుకోవాలని అధికారులకు సూచించారు.

100 రోజుల్లో కార్యాచరణ పూర్తి: డిజిటల్ గవర్నెన్స్ అమలుకు అవసరమైన విధానాలను రూపొందించేందుకు వివిధ శాఖల ఉన్నతాధికారులతో ప్రత్యేక కమిటీ ఏర్పాటు చేయాలని సీఎం ఆదేశించారు. రాష్ట్రవ్యాప్తంగా క్షేత్రస్థాయిలో అధ్యయనం నిర్వహించి 100 రోజుల్లో సమగ్ర నివేదికతో పాటు కార్యాచరణ ప్రణాళికను సిద్ధం చేయాలని సూచించారు.

ప్రభుత్వ ఉద్యోగుల వివరాలూ డిజిటలైజేషన్: హెల్త్ కార్డులు, ఇతర సంక్షేమ పథకాల అమలును మరింత సమర్థవంతంగా నిర్వహించేందుకు ప్రభుత్వ ఉద్యోగుల వివరాలను కూడా పూర్తిగా డిజిటలైజ్ చేయాలని సీఎం ఆదేశించారు. ఈ వ్యవస్థను పర్యవేక్షించేందుకు ఆర్థిక శాఖ ఆధ్వర్యంలో ప్రత్యేక మానిటరింగ్ వ్యవస్థను ఏర్పాటు చేయాలని సూచించారు.

ఈ సమీక్ష సమావేశంలో ఎంపీ వేం నరేందర్ రెడ్డి, ప్రభుత్వ సలహాదారు రామకృష్ణారావు, ప్రభుత్వ ప్రధాన కార్యదర్శి సంజయ్ జాజు, ఎంఏ అండ్ యూడీ ప్రత్యేక ప్రధాన కార్యదర్శి జయేష్ రంజన్, సీఎం ప్రధాన కార్యదర్శి వి. శేషాద్రి, ఎంసీఆర్ హెచ్‌ఆర్‌డీ వైస్ చైర్‌పర్సన్ శాంతికుమారి, వేతన సవరణ కమిషనర్ ఎన్. శివశంకర్, ఆర్థిక శాఖ ముఖ్య కార్యదర్శి సందీప్ కుమార్ సుల్తానియా, ప్రణాళికా శాఖ కార్యదర్శి గౌరవ్ ఉప్పల్‌తో పాటు పలువురు ఉన్నతాధికారులు పాల్గొన్నారు. డిజిటల్ గవర్నెన్స్ ద్వారా ఉద్యోగుల సంక్షేమం, పారదర్శక వేతన చెల్లింపులు, ప్రభుత్వ సేవల సామర్థ్యాన్ని పెంపొందించడమే రాష్ట్ర ప్రభుత్వ ప్రధాన లక్ష్యమని ముఖ్యమంత్రి రేవంత్ రెడ్డి ఈ సందర్భంగా స్పష్టం చేశారు.