మహిళా శక్తే తెలంగాణ అభివృద్ధికి చోదకశక్తి: సీఎం రేవంత్ రెడ్డి

హైదరాబాద్, జూలై 18: మహిళా సాధికారతే తెలంగాణ అభివృద్ధికి పునాది అని ముఖ్యమంత్రి రేవంత్ రెడ్డి అన్నారు. మహిళల ఆశీస్సులు, మద్దతుతోనే 2023 డిసెంబర్‌లో ప్రజా ప్రభుత్వం ఏర్పడిందని పేర్కొన్నారు. ఫిక్కీ లేడీస్ ఆర్గనైజేషన్ (FLO) ఆధ్వర్యంలో నిర్వహించిన మహిళా పారిశ్రామికవేత్తల సమావేశంలో పాల్గొన్న ఆయన, మహిళల ఆర్థిక స్వావలంబన, పారిశ్రామికాభివృద్ధి, స్వయం సహాయక సంఘాల బలోపేతం కోసం ప్రభుత్వం అమలు చేస్తున్న కార్యక్రమాలను వివరించారు. మహిళా పారిశ్రామికవేత్తలకు మరింత ప్రోత్సాహం అందించేందుకు పలు కీలక నిర్ణయాలను ప్రకటించారు.

ఇందిరా మహిళా శక్తి భవనాలు త్వరలో ప్రారంభం: రాష్ట్రంలోని 22 జిల్లా కేంద్రాల్లో మహిళా స్వయం సహాయక బృందాల కోసం ఆధునిక సౌకర్యాలతో ఇందిరా మహిళా శక్తి భవనాలు నిర్మిస్తున్నామని సీఎం తెలిపారు. శిక్షణ, మార్కెటింగ్, వ్యాపార కార్యకలాపాలకు కేంద్రాలుగా పనిచేసేలా కార్పొరేట్ స్థాయిలో ఈ భవనాలను అభివృద్ధి చేస్తున్నామని చెప్పారు. త్వరలోనే వీటిని ప్రారంభిస్తామని వెల్లడించారు.

హైటెక్ సిటీలో రూ.1,000 కోట్ల విలువైన స్థలంలో మహిళా శక్తి బజార్: హైటెక్ సిటీ సమీపంలోని శిల్పారామం వద్ద రూ.1,000 కోట్ల విలువైన స్థలాన్ని ఇందిరా మహిళా శక్తి బజార్ కోసం కేటాయించినట్లు సీఎం వెల్లడించారు. గ్రామీణ హస్తకళలు, సంప్రదాయ ఉత్పత్తులను విక్రయించేందుకు మహిళా స్వయం సహాయక సంఘాలకు ప్రత్యేకంగా 150కిపైగా దుకాణాలను ఏర్పాటు చేసి విజయవంతంగా నిర్వహిస్తున్నామని తెలిపారు.

ఫిక్కీకి రెండు చోట్ల భూమి కేటాయింపు: మహిళా పారిశ్రామికవేత్తల అభ్యర్థనలను ప్రభుత్వం అత్యంత ప్రాధాన్యంతో పరిగణిస్తుందని పేర్కొన్న సీఎం, శిల్పారామం సమీపంలో ఫిక్కీ ప్రధాన కార్యాలయం నిర్మాణానికి 1,000 గజాల స్థలాన్ని కేటాయిస్తామని ప్రకటించారు. అలాగే ప్రభుత్వం అత్యంత ప్రతిష్ఠాత్మకంగా అభివృద్ధి చేస్తున్న భారత్ ఫ్యూచర్ సిటీలో ఫిక్కీకి ఒక ఎకరం స్థలం కేటాయిస్తామని వెల్లడించారు.

మహిళల కోసం మరో ఇండస్ట్రియల్ పార్క్ పరిశీలన: ఫిక్కీ లేడీస్ ఆర్గనైజేషన్ ఆధ్వర్యంలో ఇప్పటికే విజయవంతంగా నడుస్తున్న మహిళల ఇండస్ట్రియల్ పార్క్‌ను ప్రస్తావించిన సీఎం, అదే తరహాలో మహిళా సాధికారత కోసం మరో పారిశ్రామిక పార్క్ ఏర్పాటు చేసే అంశాన్ని ప్రభుత్వం పరిశీలిస్తుందని చెప్పారు. మహిళలు ఆర్థికంగా బలపడిన దేశాల్లో అభివృద్ధి వేగంగా జరుగుతుందని పేర్కొన్నారు.

ఫ్యూచర్ సిటీలో ఫార్చ్యూన్-500 కంపెనీలే లక్ష్యం: ఫ్యూచర్ సిటీలో అమెజాన్ వంటి అంతర్జాతీయ దిగ్గజ సంస్థలు లక్ష కోట్ల రూపాయల పెట్టుబడులు పెట్టేందుకు ముందుకు వస్తున్నాయని సీఎం తెలిపారు. భవిష్యత్తులో ప్రపంచంలోని అన్ని ఫార్చ్యూన్-500 సంస్థలను తెలంగాణకు తీసుకురావడమే ప్రభుత్వ లక్ష్యమని చెప్పారు. ఈ లక్ష్య సాధనలో ఫిక్కీ, మహిళా పారిశ్రామికవేత్తల పాత్ర కీలకమని అభిప్రాయపడ్డారు. మహిళా వ్యాపారవేత్తలను అన్ని విధాలా ప్రోత్సహించేందుకు ప్రభుత్వం కట్టుబడి ఉందని సీఎం స్పష్టం చేశారు. వారి సమస్యలు, అవసరాలు తెలుసుకునేందుకు ప్రతి మూడు నెలలకోసారి సమావేశం నిర్వహిస్తానని హామీ ఇచ్చారు.

67 లక్షల మహిళా సంఘాలకు రూ.16 వేల కోట్ల రుణాలు: తెలంగాణలో మహిళా స్వయం సహాయక సంఘాలు సరికొత్త సామాజిక, ఆర్థిక విప్లవాన్ని సృష్టిస్తున్నాయని సీఎం పేర్కొన్నారు. రాష్ట్రంలో దాదాపు 67 లక్షల మహిళలు స్వయం సహాయక సంఘాల ద్వారా అనుసంధానమై ఉండగా, వారికి రూ.16 వేల కోట్ల రుణాలు అందించామని తెలిపారు. ప్రస్తుతం మహిళలు పెట్రోల్ బంకులు నిర్వహిస్తూ కార్పొరేట్ సంస్థలతో పోటీ పడుతున్నారని చెప్పారు.

మహాలక్ష్మి – మహిళలే బస్సుల యజమానులు: మహాలక్ష్మి పథకం కింద మహిళలకు ఉచిత ఆర్టీసీ బస్సు ప్రయాణాల కోసం ఇప్పటివరకు ప్రభుత్వం రూ.11 వేల కోట్లు చెల్లించిందని సీఎం తెలిపారు. ఇది కేవలం ఉచిత ప్రయాణ పథకం మాత్రమే కాదని, మహిళలే వెయ్యి ఆర్టీసీ బస్సులకు యజమానులై అద్దెకు ఇచ్చే విధంగా ఈ పథకం రూపుదిద్దుకుందని వివరించారు.

1,000 మెగావాట్ల సౌర విద్యుత్ ఉత్పత్తి లక్ష్యం: ఇందిరా మహిళా శక్తి పథకం కింద మహిళా స్వయం సహాయక సంఘాల ఆధ్వర్యంలో 1,000 మెగావాట్ల సౌర విద్యుత్ ఉత్పత్తి చేపట్టాలని ప్రభుత్వం లక్ష్యంగా పెట్టుకుందని సీఎం వెల్లడించారు. అలాగే రాష్ట్రవ్యాప్తంగా 8 వేల ఇందిరా స్త్రీ శక్తి భవనాలకు శంకుస్థాపన చేశామని చెప్పారు.

పాఠశాలల నిర్వహణ, యూనిఫారాల కుట్టింపు బాధ్యత మహిళా సంఘాలకే: రాష్ట్రంలోని 27 వేల ప్రభుత్వ పాఠశాలల నిర్వహణ బాధ్యతను మహిళా స్వయం సహాయక సంఘాలకు అప్పగించినట్లు సీఎం తెలిపారు. అదేవిధంగా 27.5 లక్షల మంది విద్యార్థులకు రెండు జతల యూనిఫారాలు కుట్టే బాధ్యతను కూడా మహిళా సంఘాలకే అప్పగించి, ఒక్కో యూనిఫారానికి రూ.75 చొప్పున చెల్లిస్తున్నామని చెప్పారు.

అమెజాన్ ద్వారా ప్రపంచ మార్కెట్‌కు మహిళల ఉత్పత్తులు: మహిళా సంఘాలు తయారు చేస్తున్న ఉత్పత్తులను అమెజాన్ వంటి ఈ-కామర్స్ వేదికల ద్వారా ప్రపంచవ్యాప్తంగా విక్రయించేలా ప్రభుత్వం చర్యలు తీసుకుంటోందని సీఎం వెల్లడించారు. అలాగే వ్యాపార రంగంలో విశేష ప్రతిభ కనబరిచిన మహిళా సంఘాలకు ఫిక్కీ ఆధ్వర్యంలో ప్రతి సంవత్సరం అవార్డులు అందించే సంప్రదాయాన్ని ప్రారంభించాలని సూచించారు.

2034 నాటికి ట్రిలియన్ డాలర్ల తెలంగాణ లక్ష్యం: వికసిత్ భారత్-2047 లక్ష్యమైన 30 ట్రిలియన్ డాలర్ల ఆర్థిక వ్యవస్థలో తెలంగాణ కీలక పాత్ర పోషించాలని ప్రభుత్వం లక్ష్యంగా పెట్టుకుందని సీఎం తెలిపారు. ప్రస్తుతం దేశ జీడీపీలో తెలంగాణ వాటా 5 శాతం ఉండగా, దానిని 10 శాతానికి పెంచాలని సంకల్పించామని చెప్పారు. 2034 నాటికి తెలంగాణను 1 ట్రిలియన్ డాలర్ల ఆర్థిక వ్యవస్థగా, 2047 నాటికి 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడమే ప్రభుత్వ లక్ష్యమని వెల్లడించారు.

మహిళలకు ఉన్నత స్థానాలు: 

దేశంలో మహిళలను ప్రధానమంత్రి, రాష్ట్రపతి, ముఖ్యమంత్రి, గవర్నర్, న్యాయమూర్తుల వంటి అత్యున్నత పదవుల్లో ప్రోత్సహించిన చరిత్ర కాంగ్రెస్ పార్టీదేనని సీఎం పేర్కొన్నారు. సోనియా గాంధీ 2013లోనే మహిళా రిజర్వేషన్ బిల్లును ప్రవేశపెట్టారని, అది త్వరలో అమల్లోకి వస్తుందని ఆశాభావం వ్యక్తం చేశారు.

ఈ కార్యక్రమంలో ప్రభుత్వ ప్రధాన కార్యదర్శి సంజయ్ జాజు, సీఎం సలహాదారు రామకృష్ణారావు, ఫిక్కీ లేడీస్ ఆర్గనైజేషన్ జాతీయ అధ్యక్షురాలు పూజా గర్గ్, ఎఫ్ఎల్‌వో హైదరాబాద్ చైర్‌పర్సన్ సీతా రెడ్డి గడ్డం తదితర ప్రముఖులు, పెద్ద సంఖ్యలో మహిళా పారిశ్రామికవేత్తలు పాల్గొన్నారు.