నస్తూర్పల్లి / కరీంనగర్: తెలంగాణ రాజకీయాలు మళ్లీ వేడెక్కాయి. ముఖ్యమంత్రి రేవంత్ రెడ్డి పాల్గోన్న సభలో రైతు సంక్షేమం, ప్రభుత్వ పనితీరు, ప్రతిపక్షాలపై తీవ్ర విమర్శలు ప్రధానంగా నిలిచాయి.
తెలంగాణ ప్రభుత్వం చేపట్టిన రెండో విడత “రైతు భరోసా” నిధులను సీఎం రేవంత్ రెడ్డి విడుదల చేశారు. ఈ సందర్భంగా మాట్లాడుతూ, కాంగ్రెస్ పార్టీకి రైతు సంక్షేమం కేవలం నినాదం కాదని, అది తమ ప్రభుత్వ విధానమని స్పష్టం చేశారు. రైతుల ఆర్థిక భద్రత కోసం తీసుకుంటున్న చర్యలను వివరించారు.
సభలో రాజకీయ వ్యాఖ్యలు కూడా హాట్టాపిక్గా మారాయి. ఎమ్మెల్యే జీవన్ రెడ్డి చేసిన వ్యాఖ్యలను ప్రస్తావిస్తూ సీఎం స్పందించారు. “ప్రజా పాలన పోవాలి.. పాపాల భైరవుడు రావాలి” అన్న జీవన్రెడ్డి వ్యాఖ్యలపై ప్రశ్నించారు. మంత్రి పదవి రాలేదని ప్రజా పాలనపై విమర్శలు చేయడం సమంజసం కాదని విమర్శించారు. ప్రజలు స్వయంగా గడీల పాలనను తిరస్కరించి కాంగ్రెస్కు అధికారాన్ని ఇచ్చారని పేర్కొన్నారు.
పేదల సంక్షేమంపై ప్రభుత్వం తీసుకుంటున్న నిర్ణయాలను కూడా సీఎం వివరించారు. పేదలకు సన్నబియ్యం అందిస్తున్నందుకు, 4.5 లక్షల ఇళ్లు నిర్మించి ఇస్తున్నందుకు ప్రభుత్వం తప్పు చేస్తున్నదా అని ప్రశ్నించారు. గత ప్రభుత్వంపై కూడా విమర్శలు గుప్పించారు. గత సీఎం హయాంలో డబుల్ బెడ్రూమ్ ఇళ్ల వాగ్దానాలు పూర్తిగా అమలు కాలేదని ఆరోపించారు.
“20 లక్షల కోట్లు ఖర్చు చేసినా 20 వేల ఇళ్లైనా నిర్మించలేకపోయారు” అంటూ తీవ్ర వ్యాఖ్యలు చేశారు. తమ ప్రభుత్వం మాత్రం గడీలకు కాదు, ప్రజలకు పనిచేస్తుందని స్పష్టం చేశారు.
ఈ సభతో తెలంగాణలో అధికార, ప్రతిపక్షాల మధ్య మాటల యుద్ధం మరింత ముదురుతున్న సంకేతాలు కనిపిస్తున్నాయి. రైతు భరోసా నిధుల విడుదలతో పాటు రాజకీయ విమర్శలు కూడా ముందున్న ఎన్నికల దిశగా వేడి పెంచుతున్నాయి.