హైదరాబాద్, జూలై 2: రాష్ట్ర సచివాలయంలో మంత్రి సీతక్క నేతృత్వంలో ఆదివాసి, గిరిజన శాసనసభ్యులు ముఖ్యమంత్రి రేవంత్ రెడ్డిని కలిసి ఏజెన్సీ ప్రాంతాల అభివృద్ధికి సంబంధించిన పలు కీలక అంశాలపై వినతిపత్రాలను సమర్పించారు. గిరిజన ప్రాంతాల్లో మౌలిక సదుపాయాల విస్తరణ, గృహ నిర్మాణం, విద్య, సాగునీటి అభివృద్ధి, ఐటీడీఏల బలోపేతం వంటి అంశాలపై ప్రభుత్వం ప్రత్యేక దృష్టి సారించాలని కోరారు. ఏజెన్సీ ప్రాంతంలోని ప్రతి నియోజకవర్గానికి అదనంగా 2,000 ఇందిరమ్మ ఇళ్లను కేటాయించాలని ఎమ్మెల్యేలు ముఖ్యమంత్రిని కోరారు. దూర ప్రాంతాల్లో నివసిస్తున్న గిరిజన కుటుంబాలకు శాశ్వత నివాసాలు కల్పించడం అత్యవసరమని వారు వివరించారు.
అదేవిధంగా, పోడు భూములకు శాశ్వత పట్టాలు మంజూరు చేయడంతో పాటు “ఇందిర గిరి జల వికాసం” పథకాన్ని అమలు చేయాలని విజ్ఞప్తి చేశారు. ఈ పథకం ద్వారా గిరిజన రైతులకు సాగునీటి సౌకర్యాలు మెరుగుపడి వ్యవసాయ ఉత్పాదకత పెరుగుతుందని తెలిపారు. గిరిజన విద్యాభివృద్ధికి ప్రాధాన్యత ఇస్తూ, ప్రస్తుతం ఉన్న గిరిజన ఆశ్రమ పాఠశాలలను ఇంటర్‌మీడియట్‌ వరకు అప్‌గ్రేడ్ చేయాలని కోరారు. ఉన్నత విద్య కోసం విద్యార్థులు ఇతర ప్రాంతాలకు వెళ్లాల్సిన ఇబ్బందులు తగ్గుతాయని ఎమ్మెల్యేలు అభిప్రాయపడ్డారు. అలాగే, గిరిజన సంక్షేమ కార్యక్రమాల అమలులో కీలక పాత్ర పోషిస్తున్న ఐటీడీఏలను మరింత బలోపేతం చేసి, అవసరమైన నిధులు, సిబ్బంది, అధికారాలను పెంచాలని ముఖ్యమంత్రిని కోరారు.
ముఖ్యమంత్రిని కలిసిన వారిలో మంత్రి సీతక్కతో పాటు అశ్వరావుపేట ఎమ్మెల్యే జారే ఆదినారాయణ, పినపాక ఎమ్మెల్యే పాయం వెంకటేశ్వర్లు, ఇల్లందు ఎమ్మెల్యే కోరం కనకయ్య, భద్రాచలం ఎమ్మెల్యే తెల్లం వెంకట్రావు, ఖానాపూర్ ఎమ్మెల్యే వెడ్మ బొజ్జు ఉన్నారు. ఈ సమావేశంలో మంత్రులు పొంగులేటి శ్రీనివాసరెడ్డి, అడ్లూరి లక్ష్మణ్, అజారుద్దీన్ కూడా పాల్గొన్నారు. గిరిజన ప్రాంతాల అభివృద్ధికి సంబంధించిన వినతులను సానుకూలంగా పరిశీలిస్తామని ముఖ్యమంత్రి హామీ ఇచ్చినట్లు సమావేశంలో పాల్గొన్న నేతలు తెలిపారు.